مقارنة ما بين كاميرا الموبايل و الكاميرا البروفيشنال من حيث الميجا بيكسل

مما لا شك فيه ان كتير جدا من الناس خصوصا اللى عمرهم ما استخدموا كاميرا برو بيستغربوا من اسعار الكاميرات و كل اللى يعرفوا عن الكاميرا هو الميجابكسل، يعنى المقياس عنده من كاميرا للتانية الميجابكسل، فلما يسمع عن كاميرا 16 ميجابكسل مثلا زى النيكون 7000 و سعرها 7750 جنيه فى حين ان موبايلات كتير زى النوكيا بتقدم كاميرا بريزلوشن 41 ميجابكسل بسعر 2000 أو 3000 جنيه، و احنا هنا هنحاول نعمل مقارنة ما بين كاميرا الموبايل و الكاميرا البرو علشان تحدد الأفضل بالنسبة لك

1- الريزلوشن أو الميجابكسل : 
الميجابكسل فى حد ذاتها تعنى عدد النقط اللى فى الصورة، و طبيعى كل ما كانت النقط دى أكتر كل ما كانت الصورة فيها تفاصيل أكتر و الزووم و الكروب فيها كان بيتطلع نتائج أحسن، بس الميجابكسل فى حد ذاتها تعتبر آخر حاجة تهتم بها و أنت بتشترى كاميرا برو و ده على عكس تفكير كتير من الناس، لأن ممكن تكون الكاميرا (سواء كاميرا برو أو موبايل) بتطلع صورة ميجابكسل عالى قوى بس معظمه مش حقيقى يعنى سوفت وير، يعنى كأنك دخلته الكمبيوتر و عملت زووم من الكمبيوتر و علشان كده بتلاحظ ان صور الموبايل ماينفعش تعمل عليها زووم قوى على عكس صور الكاميرات البرو اللى تقدر تعمل عليها زووم و تكبير بدرجة كبيرة و مش بيظهر تشوهات فى الصورة. و كمان على سبيل المثال الكاميرا النيكون 5100 و النيكون 4 اس ، أول واحدة بـ 4000 جنيه و التانية سعرها حوالى 55 ألف جنيه، الأثنين ريزلوشن بتاعتهم 16 ميجابكسل! بس الفرق ان السينسور بتاع النيكون 4 اس كبير جدا و ممكن يلتقط تفاصيل أكتر بكتير لأنه بيأخد كمية ضوء أكتر ، فبالتالى الـ 16 ميجابكسل بتاعت النيكون 4 اس أكيد هتتفوق على الـ 16 ميجابكسل بتاعت النيكون 5100

2- التصوير على اضاءة خافتة: 
تقريبا التصوير فى الظالمة دى أكتر مشكلة فى الكاميرات اللى بتشتغل بديجيتال سينسور بشكل عام، و أعتقد انها مشكلة بدأت تتحل قريب مع انتاج سينسور حساس للضوء و بدون تشويه للصورة، و أكبر مشكلة فى كاميرا الموبايل بتظهر لما تستخدمه فى تصوير صور فى اضاءة ضعيفة زى الأفراح، أعياد الميلاد، و بتكون صور مالهاش أى لازمة لو صورة أوت دور بليل فى بحر أو صحراء و هتكون عبارة عن صورة سوداء كبيرة، انما فى الكاميرات البرو خصوصا الموديلات الحديثة منها و الفئات المتوسطة و العالية منها جودة صورها فى الضوء الخافت ممتازة و ممكن تصور عيد ميلاد على ضوء الشموع و هتطلع صور ممتازة و بدون تشويه ظاهر

3- شاتر سبيد:
 يعنى سرعة الكاميرا فى التقاط الصور، و كل ما كانت سرعتها عالية كل ما كانت تقدر تصور صور فيها حركة سريعة و تظهر فى الصورة كأنها ثابتة و بدون وجود تشويه أو زغللة، زى صور مباريات الكرة و صور الطيور و سباق السيارات و غيره، و معظم الكاميرات البرو سرعتها بتوصل الى 1 على 4000 من الثانية و الكاميرات البرو فى الفئة العليا تقدر توصل الى 1 على 8000 من الثانية، و طبعا لو هنقارن بالموبايل فهى حتى الآن متواضعة فى تصوير الأجسام المتحركة و حتى فى موديلات بيقولوا ان فيها مثبت صورة بس النتيجة فى الآخر بتكون غير مرضية حتى مع الموبايلات الجديدة اللى بتصور 20 صورة متتابعة و خلفه ، لسه المشوار طويل علشان تقدر تلاحق الكاميرات البرو

4- الزووم: 
كل عارفيين ان الكاميرات البرو ممكن يتغير لها عدسات و دى ميزة لأن حسب ميزانيتك أو حسب المناسبة اللى هتصور فيها تقدر تحدد العدسة اللى هتستخدمها، يعنى مثلا لو هتصور فى فرح انت محتاج عدسة وايد زووم متوسط بس يكون الفوكس سريع و فتحة العدسة كبيرة، و انت مسافر تتفسح هتحتاج عدسة وايد سوبر زووم، و أنت خارج من أصحابك و عايز تصور بورتريهات حلوة هتحتاج عدسة فتحتها كبيرة علشان تعمل تأثير البوكيا و تكون بعدها البؤرى مناسب علشان تدخل كلوز على الشخص. انما فى كاميرا الموبايل أنت محكوم بعدسة واحدة ثابتة مش بتتغير و مافيهاش زووم على الاطلاق و الزووم الرقمى قلته أحسن

5- التحكم: 
برنامج الكاميرا اللى بينزل مع التليفون التحكم فيه بيكون قليل جدا، و ممكن تلاقى برامج اضافية بتساعدك انك تتحكم فى كاميرا الموبايل بشكل أكبر، بس برضه عمرها ما هتعادل التحكم الكامل اللى هتلاقيه فى الكاميرا البرو، حيث انك ممكن تتحكم فى كل حاجة زى فتحة العدسة، سرعة شاتر، أيزو و حاجات تانية زى نقط الفوكس ، الاكسبوجير ، داينامك رينج ، تصحيح الاضاءة و غيره

المحصلة النهائية ان كاميرا الموبايل أو السمارت فون ده أوبشن من ضمن عشرات الأوبشنز اللى جواه السمارت فون، فلو هتحكم على التليفون بالكاميرا يبقى هتظلم التليفون لأنه بيقدم وظائف تانية كتير جدا، و لو هتحكم على الكاميرا البرو و تقارنها بالموبايل اللى بيصور 41 ميجابكسل مثلا أو بالسمارت فون اللى تقدر تعمل شير للصورة على الفيس بوك فى ساعتها يبقى كده أنت هتظلم التصوير فى حد ذاته. السمارت فون أداة جبارة و بتغنيك عن أجهزة كتيرة جدا، و حتى فى ظروف معينة ممكن تغنيك عن الكاميرا البرو فى حد ذاتها، بس الكاميرا البرو حتفضل هى الأفضل و الأقوى و اللى هتقدر تصور بها فى كل الظروف و تقدر من خلالها تطلع ابداع حقيقى يتجسد فى صورة.